Pse femrat kanë “Fobi” zonën e peshave të rënda

Pse femrat kanë “Fobi” zonën e peshave të rënda

E ke vënë re kur je në palestër dhe shikon meshkujt të ndarë nga njëra anë dhe femrat nga ana tjetër, respektivisht meshkujt te zona e peshave dhe femrat te cardio! Janë të ndarë me thikë 😛 dhe kjo është një situatë normale në sytë e të gjithëve, përveç rastit kur shohin një vajzë në zonën e peshave! Aty fillojnë komentet nën zë: femrat shqyejnë sytë duke thënë po kjo “si burrë” shkon ngren pesha, ndërsa meshkujt të habitur por edhe të lumtur që kanë një vizitore femër në “shtëpinë e tyre” 😉

Kush i ka bindur femrat që të ngresh pesha të bën “si burrë” apo të fryn muskujt?! E kanë provuar më parë që flasin me kaq bindje? Apo shohin modelet e fitnesit dhe mendojnë se bëhen si ato?! Ka shumë mite të gabuara në këtë aspekt. Prandaj sot kam zgjedhur të shkruaj pikërisht për “fobinë” e femrave ndaj zonës së peshave dhe pse femrat duhet të fillojnë urgjentisht të ngrejnë pesha në palestër!!!

“Nuk dua të bëhem me muskuj të mëdhenj. Thjesht dua të dobësohem dhe tonifikohem” kjo është kryefjala e çdo bisede për fitnesin me femrat! Më duhet t’a pranoj që para disa kohësh e thoja dhe vet. Derisa kuptova rëndësinë e ngritjes së peshave dhe arsyet pse nuk mund të bëhem kurrë aq “muskuloze” dhe “si burrë” sa supozohet nga ata që nuk kanë informacion, dhe sidomos derisa zbulova dashurinë për ngritjen e peshave dhe ndjesinë që marr nga një seancë e tillë në palestër.

Normalisht, çdo femër ëndërron shpesh trupin e saj ideal apo imagjinon veten si do dukej nëse do arrinte ndonjëherë të dobësohej dhe tonifikohej. Dhe padiskutim secila prej tyre ka një model të caktuar se si e do trupin: të dobët, të mbushur, me forma, elegante, me muskuj, të tonifikuar etj. Ato që kanë vullnetin dhe vendosmërinë t’a fillojnë rrugëtimin e tyre drejt realizimit të trupit të ëndërruar, gjëja e parë që bëjnë është dieta (gabim!) dhe veglat cardio në palestër, ah dhe disa ushtrime barku që i bëjnë çdo ditë! Kjo mendojnë se është rruga e duhur por unë sot dua t’i hedh poshtë këto mite!

Dieta: kam folur dhe në postime të tjera “MOS MBAJ DIETË” por ndrysho stilin e jetesës! Dieta është e përkohëshme, pas 3-4 muajsh do e lesh dhe do t’i marrësh dyfish ato që humbe.

Cardio: jam dakort që cardio të jetë pjesë e planit tënd stërvitor 3-4 herë në javë nëse kërkon të dobësohesh dhe 1-2 herë në javë nëse kërkon të tonifikohesh.

Ushtrime barku: 1-2 herë në javë duhet t’i bësh, lodhesh kot duke i bërë çdo ditë, sepse që të arrish të kesh një bark të sheshtë, shkenca ka vërtetuar që duhet të ulësh % e dhjamit total në trup dhe se ushtrimet e barkut nuk janë çelësi nr 1. “Barku i sheshtë krijohet në kuzhinë”. Pra, duke mbajtur një regjim të shëndetshëm, duke djegur më shumë kalori nga sa merr dhe duke ngrënë ushqimet që njihen botërisht se ndihmojnë në reduktimin e dhjamit në trup.

Për t’a kuptuar më qartë të gjithë idenë duhet të sqaroj që të vësh muskuj nuk ndodh sa hap e mbyll sytë. Stërvitja për të fituar forcë dhe ajo për të fituar muskuj janë të ndryshme nga njëra tjetra. Psh nëse të mjaftojnë muskujt që ke por ke dëshirë të stërvitesh me pesha, mund t’a bësh këtë duke mbajtur muskujt që ke dhe duke rritur forcën, pa rritur muskujt. Është ushqimi ai që do luajë një rol të rëndësishëm këtu. Të hash më pak kalori ose aq kalori sa për t’a mbajtur është ideale për ato që nuk duan të shtojnë muskujt.

Ka 2 lloje mënyrash stërvitje sipas rezultatit që dëshiron.

Nëse stërvitesh për rritje muskujsh:

  • Volum i lartë (volume = sete x përsëritje)
  • Kohë e lartë nën presion
  • Stërvitje e shpeshtë (5-6 herë/javë, 1-2x/ditë)
  • Teknika të veçanta stërvitje si drop sets(sete duke ulur përsëritjen por duke rritur peshën) etj
  • Kombinimi i ushtrime të përbëra me ato të izoluara
  • Periudha të shkurtra pushimi midis seteve (30-60 sekonda)
  • Stërvitje deri kur nuk mund të ngresh më edhe një tjetër përsëritje
  • Fokusi është te muskuli dhe jo te lëvizja
  • Varion pesha dhe përsëritjet, por zakonisht bëhet një peshë mesatare me përsëritje mesatare ose të larta (zakonisht 6-12 përsëritje)

Nëse stërvitesh për rritje force:

  • Volum i ulët ose mesatar (volume = sete x përsëritje)
  • Kohë e shkurtër nën presion (ngre peshat sa më shpejt të mundesh)
  • Stërvitje e jo shumë shpeshtë (3-4 herë/javë)
  • Përdorimi i shkallës, llastikut, zinxhirëve, paraleleve
  • Ka më shumë ushtrime të përbëra dhe ndonjëherë ushtrime të izoluara për zonat më të dobëta
  • Periudha më të gjata pushimi midis seteve (90 sekonda deri në 3 minuta)
  • I bën setet dhe përsëritjet e sakta
  • Fokusi është te lëvizja dhe jo muskuli
  • Varion pesha dhe përsëritjet, por zakonisht bëhet një peshë e rëndë, përsëritje të ulëta (1-5 përsëritje) për ushtrim kryesor dhe peshë mesatare me përsëritje mesatare (6-12)

 

Është shumë e rëndësishme të kuptohet njëherë e përgjithmonë që 500 gr muskuj kanë 20% më pak hapësirë se 500 gr dhjam. Pra, nëse ti humb 2kg dhjam dhe fiton 2 kg muskuj, numri në peshore do të jetë njësoj, por ti do të dukesh më e hollë dhe elegante.

Dhe sidomos duhet të kuptosh që jo çdo femër e ka të thjeshtë për të vënë muskuj, sepse varet nga femra, biokimia e saj individuale, gjenetika, tipi i trupit, stërvitja e mëparshme, çfarë tip stërvitje po bën tani, sa shpesh stërtvitet, sa po ha etj. Nuk ndodh sa hap sytë dhe ato femra që ti shikon me muskuj dhe frikësohesh se mund të bëhesh dhe ti ashtu (sepse nuk të pëlqen) të siguroj që kanë punuar shumë fort për t’i pasur ashtu. Rritja e muskujve nuk ndodh me një herë të vajtur në palestër!

Tani që i sqarova sadopak konceptet e gabuara mbi ngritjen e peshave, le të të kujtoj se pse ngritja e sa më shumë peshave është një super ide për femrat.

  • Rritet vetbesimi.Të ngresh një peshë të rëndë nga toka të bën të ndihesh e fuqishme, sikur asgjë nuk mund të të mundë! Shpesh femrat e kategorizojnë veten si “jo atletike”, “të dobëta” “të ngathta” në fushën e fitnesit. Por kur fillojnë të ngrejnë pesha e shikojnë që nuk janë fare ashtu si mendonin. Më në fund e kuptojnë që janë të forta, atletike dhe lëvizin bukur. Këtu fillojnë të mendojnë se çfarë tjetër mund të arrijnë të bëjnë që më parë se dinin.
  • I vendos vetes qëllime pozitive.Nëse je në palestër dhe fillon ankohesh me veten se nuk je mjaftueshëm, do të sjellë vetëm rezultate negative. Por nëse ti fokusohesh në pozitivizëm, duke i vendour vetes qëllime afatshkurtër si psh të rrisësh me 2kg squats herës tjetër dhe të punosh për t’a arritur pa u depresionuar, rezultatet do të vijnë natyrshëm.
  • Do të fitosh muskuj të pastër.Muskuj të pastër ndihmojnë për një trup të shëndetshëm dhe djeg dhjamin, sepse muskujt djegin shumë kalori. Për më tepër, siç dihet kur ne plakemi fillojmë të humbasim muskujt, por duke u stërvitur dhe fituar sa më shumë muskuj, humbja e tyre me moshën është më e ngadaltë dhe ti vazhdon për një kohë më të gjatë të ndihesh e fortë, e shëndetshme dhe më e lehtë në të lëvizur.
  • Rritet durimi.Të rrisësh muskuj kërkon durim. Kur je fillestare në ngritjen e peshave, ndjen ndryshim të menjëhershëm sepse trupi e ka për herë të parë dhe nuk është mësuar dhe reagon. Por pas disa viteve, e shikon që ndryshimet dhe progresi janë të ngadaltë dhe duhet shumë durim, duke punuar çdo ditë fort për të arritur objektivat. Ky është një udhëtim, prandaj përdore si mënyrë për të skalitur durimin tënd.
  • Nxit humbjen e dhjamit.Muskujt që fitohen nga ngritja e peshavë nxisin metabolizmin. Kjo nxit humbjen e dhjamit nëse ushqimi është siç duhet. Stërvitja me pesha djeg kalori jo vetëm kur je duke u stërvitur por edhe pasi ke mbaruar dhe gjatë 24 orëve.
  • Sepse është e mrekullueshme. Të ngresh pesha të rënda nga toka, të mbash mbi shpatulla një shtangë të rëndë, të lëvizësh tavolinën e rëndë vetë, të ngresh 10 kg e ujit pa ndihmën e askujt është thjesht e mrekullueshme. Dhe kjo vjen nga stërvitja me pesha në palestër.